金缸经｜期待中国更多救市政策

第3季大陆经济增长4.6%，叫做好过预期增长4.5%，可能大家都会有怀疑，粒数有几真，因为始终听亲大陆啲经济情况差多过好，但至少国统局公布头3季大陆发电量7.06万亿千瓦时，增加5.4%，至少无咁多需求，真係无谓发咁多电，电厂卖唔出电都会蚀得好甘。

但係经济增长来源喺边呢？大陆头3季社会消费零售总额35.36万亿元人民币，按年增长3.3%，9月份按年增长3.2%。但睇返2024年首八个月，上海社会消费零售总额11,889亿元人民币，按年下跌3.3%；北京期内社会消费品零售总额9,102亿元人民币，按年下降0.9%；广州期内社会消费品零售总额7,285亿元人民币，按年下降0.5%；深圳期内社会消费品零售总额6,861.32亿元，按年增长1.1%。

北上广深，社会消费零售总额头3大嘅都要下跌，反而排最尾嘅深圳，点解可以喺消费降级大环境下逆市上升？当然其中一个主要原因就係有香港人日日北，香港人虽然有钱，但最多都係顶到深圳，远少少广州都已经顶唔到，更何况北京同上海。执笔之时北上广深都未公布个别相关数字，但如果按照首3季升幅去解释，只能估计係其他一线以外城市发力，或者北上广深9月情况真係好好。

当然唔係质疑数据真伪，因为如果粒数係假，基本上都无得倾落去。我哋假设9月情况好转係因为大陆推出多项政策，刺激到经济，大家愿意消费返。问题係，中国真係要推更多措施持续刺激经济，头7个月中国31个省级行政区，除咗上海财政做到有盈余，其余都係财政赤字，最少嘅天津财赤413亿人民币，最多嘅四川财赤去到4,130亿人民币；头半年包括企业所得税同个人所得税嘅税收收入下跌5.6%，呢啲都侧面证明中国经营环境同国民收入都有下降，并非短期消费好转可以解决。

而家中国经济似乎更多由出口推动，虽然9月情况差过预期，但至少头3季人民币计价出口值18.6万亿人民币，按年升6.2%，升幅唔错。不过随住贸易摩擦不断升级，所以推动经济实际啲都係从消费出发比较好。

大陆已经减息降準，但要推动经济同消费无咁快见效，所以刺激A股利用财富效应倒推捉进消费，未尝唔係一个方法，只係现时推出2,000亿额度嘅证券、基金、保险公司互换便利（SFISF），同埋股票回购增持再贷款，真係需要更重磅嘅措施。尤其中国整体债务情况唔太乐观，就算回购贷款利率只係1.75厘，但推动股价呢啲帐面数字，对公司实际发展无咁大帮助，倒不如将呢啲贷款，直接畀企业做发展更好。至少回购推动股市作用有几大，睇下今年上半年上证走势能知一二。

金缸经

注：专栏作家言论不代表本网立场

密切留意BossMind动向！立即CLS FB Instagram Youtube